पिंग पिंग पिंगा रे पिंग पिंग पिंगा

"पिंगणे " हा नवीन शब्द मी परवाच ऐकला. "पिंग पिंग पिंगा रे पिंग पिंग पिंगा" ह्या ओळी मला लगेच आठवल्या.

तुम्हालापण आठवले असेल. पण थांबा. इथे "पिंगणे " हा शब्द "पिंगा घालणे" या अर्थी नाहीये. इथे "पिंगणे" क्रीयापदासारखे चालवायचे. म्हणजे येणे , जाणे, खाणे, पिणे तसे पिंगणे ...पिं..ग..णे...!!

म्हणजे कसे पिंगा हा शब्द घालणे क्रीयापदानंतर पूर्ण पावतो तसे इथे नाहीये .. सुजाण लोकांना समजले असेलच. असो.

आता तुम्ही विचार करत असाल हे आहे तरी काय ?? उम्म्म्मम (विचार करा..विचार करा ?? chatting (ह्याला एखादा मराठी शब्द काय असू शकतो बरे ?) करताना बरेच लोक असे उम्म्म्म लिहितात इंग्रजीमध्ये, विचार करतोय असे दाखवायला, खरे-खोटे देव जाणे ) आता तरी समजले का तुम्हाला ?? पिंगणे म्हणजे इंटरनेट वर बोलताना लोक कसे मधेच ping करतात... तेच ते पिंगणे. आताशा इंटरनेटमुळे कशी भाषेची अशी उत्क्रांती येऊ घातली आहे.

इंटरनेट गप्पा ही नव्या प्रकारची psychology आहे. म्हणजे काही लोक इथे सदैव "पेंगत" असतात. हा शब्द पिंगणेला जवळचा असला तरी विरुद्धार्थी आहे. काही लोका अचानक पणे प्रकट होतात. म्हणजे पिंगतात. असे लोक पण असतात जे काही लोक

नाहीत हे बघून पिंगायला (बघा कसा मस्त वापर होतोय ते ) बसतात आणि तेच लोक दत्त म्हणून समोर आले की काय बोलणार ?? त्यामुळे आजकाल बरेच लोका गुप्तपणे (invisible) राहतात. पण तेही तोट्यात असू शकते म्हणा.. ज्यांना एकमेकांशी बोलायचेय असे दोघेही गुप्त असतील तर मग झाली का नाही गोची ..? मग त्यांनी "पिंग टेस्ट (अजून एक वापर !! :P)" करून बघावी. हम्म्म्म ... म्हणजे उगा आपले पिंगुन बघायचे झाले... आहे का बाबा ? म्हणजे पिंगणे याचा अर्थ एखाद्याचे मायाजालातील घर ठोठावणे असा करू शकतो आपण.

काही लोका शिष्ट पण असतात. उगा कळत नाही, दाखवायचे असते काम करतात का काय नं जाणे . DND च्या पाट्या लिहून ठेवलेल्या असतात.आता DND म्हणजे काय तेवढे विचारू नका. "आम्हाला कृपा करून पिंगू नये आम्ही कामात आहोत " अर्थात do not disturb च्या पाट्या दारावर लावलेल्या! जसे काही यांना कोणी पिंगुच शकत नाही ;) काय करू शकणारेत कोणी लिहूनच गेले दारावर तर. फारतर फार चार दोन शब्द बोलेल आणि लिहील, समोरून काय करणारे.. उगा आपले दाखवायचे ... मग करा की काम गुप्तपणे .... पण नाही. अशा लोकांना पिंगुन त्रास द्यायला मजा येते कधी-कधी. कधी-कधीच. नाहीतर मी म्हणाले म्हणून काही कराल आणि.... समजले नं ...हम्म्म्म !

काही लोका मात्र नेमेची येतो हा पावसाळा याप्रमाणे अगदी रोजच्या रोज पिंगतातच (ह्या शब्दाचे वापर वाढत चालले आहे :) ).

गप्पा लिस्टवर गर्दी असेल तर गजबजलेल्या घरासारखे ते मायाजाल पण खरे खुरे वाटू लागते. बस त्या समोरच्या पडद्यामगे सगळे लोका आहेत..हाकेच्या अंतरावर असल्यासारखे ... ती लाल - हिरव्या दिव्यांची रांग पाहून मन भरून जाते.. दूर देशीच्या, जवळच्या, लांबच्या लोकांचे संमेलनच ! कधी कोणी सहसा नं दिसणारे अचानक भेटतात, अनाहूतपणे पाहुणे घरी आल्यावर कसे होते तसेच. २-४ शब्द पण नाते दृढ करून जातात. साधे hi-hello पण आपल्याला एकमेकांशी जोडून जाते. कधी कोणाशी बोललो नाही तरी ती नावे पाहून भूतकाळातले क्षण उलगडले जातात.. आठवणी हळूच डोकावून जातात .. आणि मग क्षणभर वाटते लाल दिवा दिसतोय ..पण पिंगावे का ?? :) आणि मग परत ती गप्पांची दारे उघडली जातात...

कधी कधी तीच जागा सुनी सुनी पण दिसते ... रविवारी किवा सुट्टीच्या दिवशी सकाळी सकाळी :) ... किवा मग कधी नेहेमी दिसणारे कोणी दिसत नाही आणि मग वाटायला लागते सगळे ठिक तर चालूये नं .. मग चौकशा होतात ... आणि आपण कितीही आरडओरड केली की लोकं एकमेकापासून दूर होत चालले आहेत वगैरे वगैरे.. तरी हे मायाजाल आपल्याला स्थळ-काळापासून मुक्तही करते .. आणि परत परत हे बंध निर्माणही करते .. २-४ शब्द कधी अनेक ओळीत बदलतात समजत नाही.. जगभरातल्या सगळ्या विषयांचे चर्वितचरण केले जातं.. वेळ कसा जातो समजत पण नाही.. दारे बंद करायची वेळ येते आणि सहजच म्हणले जाते " पिंगत जा ग अधून -मधून ... तेवढाच बरे वाटते ."

असा हा पिंगण्याचा उत्सव गेली काही वर्षे चालूये... आता तर दारावर लिहिलेली पाट्या अजून गहिऱ्या होत चालल्या आहेत.. लोकांचा गोतावळा वाढतोच आहे.. हवे तेव्हा एकटे राहावे आणि हवे तेव्हा लोकात मिसळावे .. हा चमत्कार हा पिंगाच करू जाणे. हा पिंग पिंग पिंगा थांबेल असे तर वाटत नाही...

मग तुम्ही कधी पिंगताय आमच्या दारावर ??