अजूनही काही बाकी आहे

अजूनही काही बाकी आहे
ते क्षण सोनेरी
ओंजळीतून सुटलेले
निसटलेले
त्यांची किरणे होणे बाकी आहे

धूसर धूसर दिशा
कधी भटकलेल्या
कधी भेटलेल्या
कधी दुरूनच पाहिलेल्या
त्यांची वाट होणे बाकी आहे

तेच रस्ते , तीच गावे
तेच चेहरे ओळखीचे
आपलेच एक
अनोळखी अस्तित्व शोधणे बाकी आहे

कधी राहून गेलेल्या
कधी राहू दिलेल्या
कधी सुप्तपणे कुरवाळलेल्या
आकांक्षा
अजून आयुष्यावर ओवाळून टाकणे बाकी आहे

केलेल्या चुका
मिळालेल्या सजा
फेकलेले शब्द
झेलले जे भाले
त्यांचा ताळमेळ लागणे अजून बाकी आहे

वळणाना वळणं भेटली
तीच पुन्हा पूर्वीची
थांब अजूनही ..
पुन्हा एकदा
जगणं मनभर पसरणं बाकी आहे

- रश्मी